پشاور دہشتگردی؛تحریک طالبان پاکستان ذمہ واری من گھدی اے،نگران وزیر داخلہ اعظم خان یا ایوان بالا اچ ہارون بلور دے تعزیتی ریفرنس تے گالھ مہاڑ

اسلام آباد ۔ 11 جولائی (اے پی پی) نگران وزیر داخلہ اعظم خان آکھیے جو تحریک طالبان پاکستان پشاوراچ دہشت گردی دی ذمہ داری من گھدی اے، سیاسی قیادت کوں وی اپنڑی حفاظت کیتے انتظامیہ نال ہتھ ونڈاونڑاں چاہیدے۔سینیٹ اجلاس اچ ہارون بلور دے تعزیتی ریفرنس اچ الویندے ہوئیں نگران وزیر داخلہ دا آکھنڑ ہا جو سیکرٹری داخلہ دے زیر صدارت وزارت داخلہ دا ہک اجلاس تھئے اتے وزیراعظم وی ہک اعلیی سطح اجلاس دی اگوانڑی کیتی اے جیندے اچ پشاور دھماکے توں بعد دی ساری صورتحال دا جائزہ گھدا گئے،او وزیراعظم نال خمیس آلے دینہہ پشاور ویندے پین جتھاں ایپکس کمیٹی دا اجلاس سڈیا گئے۔ اجلاس اچ کور کمانڈر پشاور اتے خفیہ ایجنسیاں دے اہلکار وی ہوسن۔انہاں ڈسائے جو کجھ ڈینہہ پہلے نیکٹا دے اجلاس اچ امن و امان دی صورتحال اتے دہشتگردی الرٹس دے نال نال سیکیورٹی خدشیاں سانگے کجھ ناں وی ڈسائے گین ۔پہلے نیکتا اجلاس اچ سیاسی جماعتاں نئین آ سگیاں ایں سانگے اے اجلاس ولا سڈیا گئے تاں جو انتخابی ضابطہ اخلاق تے عمل تھیوے اتے انتخابی میٹنگز بارے انتظامیہ کوں پیشگی ڈسایا ونجے۔انہاں ڈسایا جوہارون بلور کوں رات یارھاں وجے چاہ دی دعوت ڈتی گئی جتھاں خود کش حملہ آورکون دہشتگردی دا کھلا موقع مل گئے۔انہاں آکھیے جو ہارون بلوچ دی شہادت اتے قیمتی جاناں دے زیاں تے ساکوں وی ڈکھ اے بھل سیاسی قیادت کون وی چاہیدے جو او اپنڑی حفاظت اتے حفاظتی اقدامات سانگے انتظامیہ نال تعاون کرن۔

مضمون کا ماخذ : لاٹری جیتنے کی گائیڈ

متعلقہ مضامین