اسلام آباد۔2دسمبر(اے پی پی):صدر مملکت ڈاکٹر عارف علوی آکھیے جو خصوصی لوکاں دی معاشرے اچ شمولیت تے انہاں کوں بااختیار بݨاوݨ کیتے ھک جامع منصوبے وضع کرݨ ، معاون ٹیکنالوجیز ݙیوݨ تے انہاں دی معذوری دے اعتبار نال موزوں ملازمتاں ݙیوݨ دی لوڑھ اے ، سرکاری تے نجی شعبیں دے متعلقہ ادارے خصوصی لوکاں دی ضرورتاں کوں سامݨے رکھیندے ہوئیں موجودہ قوانین تے نظرثانی کیتے رل تے کم کرن ۔ اے ڳالھ انہاں جمعہ کوں ایوانِ صدر اچ خصوصی لوکاں دے حوالے نال اجلاس دی صدات کریندے ہوئیں آکھی اے ۔اجلاس اچ چیف کمشنر اسلام آباد، وزارت تعلیم، عالمی ادارہ صحت تے ایوانِ صنعت و تجارت دے نمائندیں شرکت کیتی۔ صدر مملکت آکھیے جوخصوصی لوکاں دی معاشرے اچ شمولیت تے انہاں کوں بااختیار بݨاوݨ کیتے ھک جامع منصوبے دی لوڑھ اے ، خصوصی لوکاں دی نقل و حرکت تے عوامی سہولتاں تئیں رسائی بݨا تے انہاں کوں معاشرے دا فعال شہری بݨایا ونڄ سڳدے۔ انہاں آکھیے لوک باہم معذوری کوں تعلیم، ہنر تے ملازمتاں ݙے تے معاشرے اچ شامل کیتا ونڄݨا چاہیدے ، خصوصی لوکاں کوں معاون ٹیکنالوجیز ݙیوݨ تے انہاں دی معذوری دے اعتبار نال موزوں ملازمتاں ݙیوݨ دی لوڑھ اے ۔ انہاں آکھیے پاکستان دی آبادی دا 10 توں 15 فیصد یا تقریباً 22 ملین لوک خصوصی لوکاں تے مشتمل اے ، خصوصی لوکاں دی اتنی وݙی آبادی کوں قیمتی اثاثے اچ بدلیا ونڄ سڳدے ۔ ڈاکٹر عارف علوی آکھیے جو سرکاری تے نجی شعبیں دے متعلقہ ادارے خصوصی لوکاں دیاں ضرورتاں کوں سامݨے رکھ تے موجودہ قوانین تے نظرثانی کیتے رل تے کم کرن ، متعلقہ ریگولیٹری اتھارٹیز کوں سارے سرکاری تے نجی عمارتاں، انفراسٹرکچر، سکولاں اتے صحت دیاں سہولتاں دا ھک جامع اتے مستند آڈٹ کرݨ کیتے تیار رہݨا چاہیدے ۔
.jpg)
.jpg)
